Махсус имкониятлар
Ҳокимлик аввалги изоҳларининг таги пуч экани маълум бўлгач, энди бошқа сабабни рўкач қиляпти: эмишки, юк машиналарига кластер томонидан техник чигит ўрнига уруғлик чигит юклаб юборилган. Орадан шунча кун ўтиб айтилаётган бу гапга энди ким ишонади?
Фото: Қашқадарё вилояти ҳокимлиги/Kun.uz
Чироқчи туманидаги “Умакай” постида каттақўрғонлик тадбиркорларга тегишли чигит ЙПХ ходимлари томонидан тўхтатиб қолингани ва бу топшириқ Қашқадарё вилояти ҳокимлиги томонидан берилгани ҳақида бир нечта мақола эълон қилинди.
Kun.uz мухбири воқеа жойидан махсус репортаж тайёрлади.
Умуман, чигит воқеаси юзага чиққач, дастлаб Қашқадарё вилояти ҳокимлигининг дастлабки позицияси бугунга келиб бутунлай ўзгача тус оляпти. Яъни ҳокимлик энди вазиятни бошқа томонга буришга ҳаракат қилаётгани ойдинлашиб қолди.
Хусусан, ҳокимлик Telegram-каналида 4 январ куни муносабат эълон қилинганди. Унда ҳолат ҳокимлик томонидан атрофлича ўрганилгани, “Maroqand Gold Oil Ekstraksiya” МЧЖ олиб кетаётган чигит маҳсулоти бўйича QR-кодга эга ҳисобварақ-фактура бўлмагани ва тақдим этилган ҳужжатларда шубҳа туғилгани сабабли қонуний равишда вақтинча сақловга олингани баён қилинган. Шунингдек, тадбиркорлар электрон имзо билан тасдиқланмаган электрон ҳисобварақ-фактурасининг қоғоз нусхасини тақдим этмагани айтилган.
Мантиқни қаранг, ўзи электрон ҳисобварақ бўлса-ю, унинг яна қоғоз нусхаси тақдим қилинса!
Амалдаги қоидаларга кўра, электрон ҳисобварақ-фактурани сотиб олувчи шу заҳоти тасдиқлаши шарт эмас. Бунинг учун 10 кун муддат берилган. Сотиб олувчи ҳатто фактурани тасдиқламасликка ҳам ҳақли. 10 кун ичида тасдиқламаса ёки рад этмаса, электрон ҳисобварақ-фактура автоматик равишда тасдиқланган ҳисобланади.
Демак, тадбиркорларнинг юки камида эртаси куни ёки ҳокимлик ҳолатни ўрганиб чиққан заҳоти қўйиб юборилиши керак эди. Чунки бугунга келиб ушбу олди-сотди ноқонуний бўлмагани, ҳужжатлар ҳам мавжудлигига ҳеч қандай шубҳа қолмади.
Энди Қашқадарё вилояти ҳокимлиги вазиятни 180 даражага ўзгартирмоқчи бўляпти. Вилоят ҳокимлиги ахборот хизмати бизга “Oq Saroy Klaster” МЧЖнинг хатини тақдим этди. Бу хатда жамият техник чигит ўрнига 2022 йил ҳосили учун экилиши режалаштирилган уруғлик чигитини юклаб юборгани қайд этилган.
“Оқсарой кластер” МЧЖ томонидан ушбу хатоликка йўл қўйган масъул ходимларга нисбатан интизомий жазо чоралари кўрилган ҳолда, келиб чиққан камчиликларни бартараф этиш мақсадида чигит юкланган юк машиналарини “Умакай” мунтазам йўл патрул масканида маълум муддатга тўхтатиб туриш тўғрисида хабар қилинди.
Юқоридагилардан келиб чиқиб, захира уруғлик чигит қайтариб олиниб, “Maroqand Gold Oil Ekstraksiya” МЧЖ ёғ корхонасига 10 кун муддатда биржа савдоларида ютиб олинган техник чигитни юклаб бериш юзасидан келишиб олинди”, дейилади муносабатда.
Шунингдек, барча зарар “Оқсарой кластер” МЧЖ томонидан қоплаб берилиши маълум қилинган.
Очиғи, ўнлаб, йигирмалаб саволларни келтиришдан наф йўқ бу вазиятда. Аниқ факт шуки, ЙПХ ходимлари вилоят ҳокимининг топшириғи билан чигитни тўхтатгани бўйича рад этиб бўлмас факт (видео) ҳам бор. Юкни тўхтатишда ҳужжатлар баҳона қилингани ҳам очиқ ҳақиқат. Вазиятни юмшатиш мақсадида Каттақўрғон шаҳар ҳокими Гавҳар Алимова Қашқадарё ҳокими билан гаплашгани, тадбиркорларнинг ўзи ҳам юкни қўйиб юборишни сўраб бир неча марта постга, ҳокимиятга боргани ва ўша пайтда қилинган муносабатни эслашнинг ўзи кифоя.
Kun.uz “Maroqand Gold Oil Ekstraksiya” раҳбарлари билан боғланди. Тадбиркорларга ҳам кластер ходимлари уруғлик чигитни билмасдан юклаб юборишганини айтган. Ваҳоланки, уруғлик чигит захираси алоҳида сақланиб, ҳудуддан чиқаётганда маҳсулотдан намуна олинади. Шунингдек, уруғлик чигит дориланган бўлади ва рангиданоқ фарқ қилади. Ва энг асосийси, уруғлик чигит дейилаётган ўша юз тонналик “захира” айни вақтдаям “Умакай” постида чириб боряпти. Ундан намуна олиш ва масалага ойдинлик киритиш учун одамдан кўп нарса талаб қилинмайди, албатта.
Дарвоқе, биз суриштирувимизда яна бир корхона – “Kattakurgan Yog Moy” МЧЖга тегишли юз тонна маҳсулот ҳам 2021 йилнинг 30 декабр куни юкланган бўлса-да, жўнатиб юборилмаётгани ҳақида хабар бергандик. Юк машиналарида кечагина турган маҳсулот бугун тушириб олингани айтилмоқда. Хўш, бу чигит ҳам уруғлик учун мўлжалланганмиди?
Бир сўз билан айтганда, тасодифлар бунчалик кўп бўлмаслиги керак.
Юқоридаги икки муносабатнинг бир-бирига зидлиги Қашқадарё вилояти ҳокимлигининг асл юзини очиб қўйди.
Kun.uz ҳолат юзасидан суриштирувларини давом эттиради ва мавзуга яна қайтади.
Исомиддин Пўлатов,
Kun.uz мухбири.
