ҲОКИМ “БУЛЬВАР”ДАГИ ҲОЛАТДАН ЯНА НОРОЗИ БЎЛДИ

Лоф эмас, бугун Каттақўрғон шаҳрида катта ҳажмдаги бунёдкорлик ишлари олиб борилмоқда. 20 йиллардан буён эътибордан четда қолиб келган шаҳардаги бугунги ўзгаришларни ёшу-қари каттақўрғонликларнинг эътироф этаётгани фикримизнинг исботидир.

Ана шу ислоҳотлар сабаб маҳаллалар, хонадонлар, кўчалар обод бўлди. Шаҳарни ижтимоий-иқтисодий ривожлантириш борасидаги ишлар доирасида шаҳар ҳокимининг саъй-ҳаракати билан “Бульвар” ташкил қилинган эди. Шу ердаги аҳолининг ишдан бўш вақти, дам олиш кунларини мазмунли ўтказиш учун бу ерда ўзгача дам олиш маскани барпо этилди.

Дам олувчиларга кўтаринкилик бериш мақсадида тунги чироқлар ўрнатилиб, атрофи турли хил манзарали дарахтлар, гуллар билан безатилди.

Афсуски, яқинда бу ерда бўлган шаҳар ҳокими Гавҳар Алимова ҳудуддаги дилни хира қиладиган ҳолатнинг гувоҳи бўлди.  Яъни, чироқлар синдирилган, гуллар суғуриб кетилган.

Шаҳар ҳокими бугун шаҳарда кенг кўламдаги ободончилик, бунёдкорлик ишлари кетаётган бир вақтда маърифатли, маънавиятли ва зиёлилар шаҳри сифатида эътироф этилаётган шаҳарда шунақанги инсонларнинг борлиги, ўзгаларга завқ берадиган гўзалликни йўқ қилаётгани жуда ачинарли ҳол эканлигини таъкидлади.

Ҳақиқатдан ҳам, бу жуда хунук иш. Бир каттақўрғонлик сифатида бу ҳолатдан бизнинг ҳам дилимиз оғриди.

Агар қўлингиздан бир дарахт экиш, бир жойни обод қилиш келмаса шу ишни қилаётган ҳамшаҳарларингизни меҳнатини қадрланг. Жамиятга фойдангиз тегмаётган экан, жила қурса зарарингиз ҳам тегмасин.

Биз шаҳримизнинг бугуни ва келажаги учун, шу ердаги аҳолининг яхши яшаши, фаровонликда ҳаёт кечириши йўлида амалга оширилаётган ишларни барча каттақўрғонликлар дилдан ҳис қилишини истардик. Хулоса чиқариш виждонингизга ҳавола.  Зеро, сиз учун энг олий ҳакам виждонингиздир.

Каттақўрғон шаҳар ҳокимлиги Ахборот хизмати

2015-2024 © Каттақўрғон шаҳар ҳокимлиги. Сайт яратувчиси: SAKTRM