Бугун юртимизда коронавирус сабабли юзага келган синовли кунларни енгиб ўтишда, қолаверса ушбу касалликни олдини олиш ва унга қарши курашишда улкан ҳисса қўшаётган шифокорларимизнинг беминнат хизматлари таҳсинга лойиқ. Айни кунларда мана шу шарафли касб эгалари шаънига жуда кўплаб ташаккурлар, раҳматлар айтилмоқда. Жорий йилнинг 26 март куни коронавирус инфекцияси тарқалишига қарши курашишни кучайтириш масалаларига бағишланган видеоселектор йиғилишида ҳам  Президентимиз дунё бўйлаб, хусусан, мамлакатимизда шифокорларнинг ўз касбига садоқати, халқимиз, ота-оналаримиз, фарзандларимиз соғлиғи йўлида тун-кун қилаётган меҳнатларини барчамиз учун жасорат намунаси эканлигини алоҳида таъкидладилар.

Шаҳримиздаги Тиббиёт бирлашмасида фаолият юритаётган барча тиббиёт ходимлари ҳам ана шундай таърифга лойиқлар. Бугун халқ саломатлиги йўлида туну-кун хизмат қилаётган ана шу оқ халатли халоскорларга саховатпеша тадбиркорларнинг хайрли амаллари билан ош тарқатилди. Бу албатта фидойи касб эгаларининг қилаётган меҳнатларига халқимиз томонидан берилган юксак ҳурмат намунасидир.

Шаҳар ҳокими Гавҳар Алимова фидойи шифокорларимизнинг самарали меҳнатларини юксак баҳолаб,  белгиланган тартиб-қоидаларга амал қилиш орқали ҳамда халқимизнинг саховатпешалик, меҳр-мурувватлилик, оқибатлилик каби юксак фазилатлари ҳамда бир-бирини қўллаб-қувватлашдек саъй-ҳаракатлари ушбу синовни енгишда муҳим аҳамият касб этишини айтиб ўтди.  

Ҳилола ЭРГАШЕВА,

Жамшид НОСИРОВ.